وفاقی وزیر داخلہ محسن نقوی نے کہا ہے کہ مدارس یا مساجد کی بندش کے حوالے سے پھیلائی جانے والی پروپیگنڈا مہم بے بنیاد ہے، کسی بھی مدرسے یا مسجد کو بند نہیں کیا جا رہا۔ کراچی میں چیئرمین سنی تحریک محمد ثروت اعجاز قادری سے ملاقات کے دوران ان کے ہمراہ صوبائی وزراء شرجیل انعام میمن اور سید ناصر حسین شاہ بھی موجود تھے۔ ملاقات میں علمائے کرام کی خدمات کو خراجِ تحسین پیش کیا گیا جبکہ مذہبی ہم آہنگی اور اتحاد پر زور دیا گیا۔ محسن نقوی نے کہا کہ دینِ اسلام امن اور محبت کا درس دیتا ہے، ہر شخص کو قانون کے دائرے میں احتجاج کا حق حاصل ہے لیکن ملک میں تشدد اور شرانگیزی کی کوئی گنجائش نہیں۔ انہوں نے مزید کہا کہ پاکستان ترقی کی راہ پر گامزن ہے اور موجودہ حالات میں سب کو مل کر قومی ترقی میں اپنا کردار ادا کرنا چاہیے۔ چیئرمین سنی تحریک ثروت اعجاز قادری نے مذہبی ہم آہنگی کے فروغ میں حکومت کے ساتھ مکمل تعاون کی یقین دہانی کرائی۔
