گلگت بلتستان کے الیکشن کمیشن نے نئی بھرتیوں، تبادلوں اور ترقیاتی اسکیموں پر پابندی عائد کرتے ہوئے باقاعدہ نوٹیفکیشن جاری کر دیا ہے۔ اے آر وائی نیوز کے مطابق الیکشن کمیشن جی بی نے تمام سرکاری محکموں کو ہدایت کی ہے کہ پابندی کا سختی سے نفاذ یقینی بنایا جائے۔ اعلامیے کے مطابق اگر عوامی مفاد میں بھرتیاں ناگزیر ہوں تو اس کے لیے الیکشن کمیشن سے پیشگی منظوری لینا لازم ہوگی۔ اس کے علاوہ جاری ترقیاتی منصوبوں کے فنڈز کو دیگر اسکیموں میں منتقل کرنے پر بھی پابندی ہوگی، جب کہ لوکل گورنمنٹ سے متعلق ترقیاتی فنڈز بھی منجمد رہیں گے۔ یہ فیصلہ اس پس منظر میں کیا گیا ہے کہ اگلے ماہ 24 نومبر کو گلگت بلتستان اسمبلی اپنی پانچ سالہ آئینی مدت مکمل کر رہی ہے۔ پابندی کا اطلاق فوری طور پر ہوگا اور صوبائی اسمبلی و مقامی حکومتوں کے انتخابات کے انعقاد اور نتائج کے اجرا تک برقرار رہے گا۔
