وزیر دفاع خواجہ محمد آصف نے پاکستان اور افغانستان کے درمیان جنگ بندی معاہدے کی تصدیق کرتے ہوئے کہا ہے کہ دونوں ہمسایہ ممالک ایک دوسرے کی سرزمین کا مکمل احترام کریں گے۔
سماجی رابطے کی ویب سائٹ ایکس (X) پر جاری اپنے بیان میں خواجہ آصف نے بتایا کہ دونوں ممالک کے درمیان سیز فائر معاہدہ طے پا گیا ہے اور اب افغانستان کی جانب سے پاکستان میں دہشت گردی کا سلسلہ فوری طور پر بند ہوگا۔ انہوں نے مزید کہا کہ 25 اکتوبر کو استنبول میں دونوں ممالک کے وفود کے درمیان دوبارہ ملاقات ہوگی، جس میں تفصیلی معاملات پر بات چیت ہوگی۔وزیر دفاع نے اس عمل میں قطر اور ترکیہ کے کردار پر شکریہ ادا کرتے ہوئے کہا کہ دونوں برادر ممالک نے ثالثی میں اہم کردار ادا کیا۔اس سے قبل قطر کی وزارتِ خارجہ نے اپنے بیان میں تصدیق کی تھی کہ پاکستان اور افغانستان کے درمیان دوحہ میں قطر اور ترکیہ کی ثالثی کے تحت مذاکرات کے کئی ادوار ہوئے۔ ان مذاکرات کے دوران دونوں فریقین نے فوری جنگ بندی اور دیرپا امن و استحکام کے قیام پر اتفاق کیا۔
