راولپنڈی اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف 7 کامیاب کارروائیاں کرتے ہوئے 6 ملزمان کو گرفتار اور 205 کلوگرام سے زائد منشیات برآمد کرلیں۔ ترجمان کے مطابق علامہ اقبال انٹرنیشنل ایئرپورٹ لاہور پر کارروائی کے دوران عمرہ کی ادائیگی کے لیے جدہ جانے والے ایک مسافر کے پیٹ سے آئس بھرے 94 کیپسول برآمد کیے گئے، جن کا وزن 0.219 کلوگرام تھا، جب کہ 0.562 کلوگرام ہیروئن بھی ملی۔ دوسری کارروائی میں ایک اور مسافر کے پیٹ سے 73 ہیروئن بھرے کیپسولز برآمد ہوئے جن کا وزن 0.442 کلوگرام تھا۔ترجمان اے این ایف کے مطابق چکلالہ گیریژن راولپنڈی میں برطانیہ سے آنے والے پارسل سے 68 گرام ویڈ برآمد ہوئی، جبکہ کالا شاہ کاکو ٹول پلازہ کے قریب ایک گاڑی سے 120 کلوگرام چرس اور 30 کلوگرام افیون برآمد کر کے ایک ملزم کو گرفتار کیا گیا۔ اسی طرح کوئٹہ کے علاقے بالیلی کے قریب کارروائی میں 30 کلوگرام چرس، بنوں کوہاٹ روڈ پر 14.4 کلوگرام چرس اور 3.6 کلوگرام افیون جبکہ کراچی کے رئیس گوٹھ، حب روڈ کے قریب کارروائی میں 6 کلوگرام چرس برآمد کی گئی۔ ترجمان کے مطابق تمام گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر لیے گئے ہیں اور مزید تحقیقات جاری ہیں۔
