کراچی میں پانی کی فراہمی کے حوالے سے مرمتی کام مکمل ہونے کے باوجود شہر کے کئی علاقوں میں سپلائی بحال نہ ہو سکی، جس کے باعث شہریوں کو شدید مشکلات کا سامنا ہے۔ واٹر کارپوریشن کے مطابق نارتھ ایسٹ پمپنگ اسٹیشن کے دو مقامات اور دھابیجی میں پانی کی پائپ لائنوں کی مرمت رات ایک بجے مکمل کر لی گئی، تاہم 12 گھنٹے گزرنے کے باوجود گلستانِ جوہر، گلشنِ اقبال، صفورا، لیاقت آباد، نارتھ ناظم آباد، ناظم آباد، گلبرگ اور فیڈرل بی ایریا سمیت متعدد علاقوں میں پانی کی بندش برقرار ہے۔
واٹر کارپوریشن کے ترجمان نے بتایا کہ شہریوں کی فوری ضروریات کو مدنظر رکھتے ہوئے تین ہائیڈرنٹس — نیپا، صفورا اور سخی حسن — پر پانی کی فراہمی بحال کر دی گئی ہے تاکہ شہری ٹینکرز کے ذریعے عارضی طور پر پانی حاصل کر سکیں۔ ترجمان کا مزید کہنا تھا کہ پانی کی سپلائی کے نظام کو مرحلہ وار بحال کیا جا رہا ہے اور امکان ہے کہ دوپہر 3 بجے تک متاثرہ علاقوں میں پانی کی فراہمی شروع ہو جائے گی۔
