فرانس کے علاقے سینٹ روز، گواڈیلوپ میں ڈکیتی کا ایک انوکھا واقعہ پیش آیا، جہاں ایک 60 سالہ شخص سپر مارکیٹ لوٹنے کے بعد خود گرفتاری کے انتظار میں وہیں رک گیا۔ غیر ملکی میڈیا رپورٹس کے مطابق سابق فائر فائٹر رہ چکا یہ شخص، جس کا کوئی کرمنل ریکارڈ نہیں تھا، ستمبر کے آخر میں منہ پر سیاہ نقاب اور ہاتھ میں ہتھیار لے کر ایک سپر مارکیٹ میں داخل ہوا، جو مقامی تھانے کے قریب واقع تھی۔ اس نے کاؤنٹر سے رقم مانگی، ایک ٹکڑا پنیر اور ایک بوتل شراب لی، پھر پرسکون انداز میں گاڑی کی طرف گیا اور پولیس کا انتظار کرنے لگا۔ رپورٹس کے مطابق اس کا مقصد مالی فائدہ نہیں بلکہ اپنے قید پوتے کی مدد کرنا تھا، جسے جیل میں تشدد کا نشانہ بنایا گیا تھا۔ عدالت میں اس نے مسلح ڈکیتی، سنگین حملے اور بغاوت کے الزامات قبول کر لیے، تاہم عدالت نے اس کی نیت انسانی سمجھتے ہوئے عام سزا (جو 3 تا 5 سال ہوسکتی تھی) دینے سے انکار کیا۔ عدالت نے ہدایت کی کہ وہ متاثرین کو معاوضہ ادا کرے اور آئندہ اس سپر مارکیٹ کے قریب نہ جائے۔
