راولپنڈی: پاکستان اور ساؤتھ افریقہ کے درمیان راولپنڈی کرکٹ اسٹیڈیم میں ہونے والے میچز کے لیے ٹریفک پولیس نے خصوصی ٹریفک پلان جاری کر دیا ہے، جس کے تحت 20 سے 24 اکتوبر تک راستوں کی بندش کی جائے گی۔ ٹریفک پولیس کے ترجمان نے بتایا کہ 367 سے زائد ٹریفک افسران اور اہلکار ڈیوٹی سرانجام دیں گے اور ٹیموں کی نقل و حرکت کے دوران ٹریفک کو متبادل راستوں پر موڑا جائے گا۔ اسلام آباد سے آنے والی ٹریفک کو فیض آباد سے ایکسپریس وے کی طرف موڑ دیا جائے گا جبکہ راولپنڈی سے اسلام آباد جانے والی ٹریفک سکستھ روڈ سے سید پور کی طرف روانہ کی جائے گی۔ میچ کے دوران اسٹیڈیم روڈ نائنتھ ایونیو چوک سے ڈبل روڈ تک بند رہے گا، تاہم نائنتھ ایونیو کے راستے اسلام آباد سے آنے والے شہری آئی جے پی روڈ اور فیض آباد کے راستے استعمال کر سکیں گے۔ سی ایس او ٹریفک کا کہنا تھا کہ کرکٹ شائقین کے لیے سول ایوی ایشن گراؤنڈ، شہباز شریف پارک، اور گریجویٹ کالج میں تین پارکنگ پوائنٹس مختص کیے گئے ہیں۔ شائقین کی سہولت کے لیے پارکنگ ایریاز سے اسٹیڈیم تک شٹل سروس بھی فراہم کی جائے گی تاکہ عوام کو کسی قسم کی مشکلات کا سامنا نہ کرنا پڑے۔
