مالاکنڈ میں سوات موٹر وے پر خوفناک حادثے کے نتیجے میں خانہ بدوشوں سے بھرا ٹرک الٹنے سے خواتین اور بچوں سمیت 15 افراد جاں بحق جبکہ 6 شدید زخمی ہوگئے۔
ابتدائی اطلاعات کے مطابق حادثہ سوات موٹر وے کے ٹنل نمبر 3 کے قریب پیش آیا، جہاں تیز رفتاری کے باعث ٹرک ڈرائیور کے قابو سے باہر ہوکر کھائی میں جا گرا۔ حادثے میں جاں بحق ہونے والے تمام افراد کا تعلق ایک ہی خاندان سے بتایا جا رہا ہے۔ریسکیو 1122 مالاکنڈ کے مطابق جاں بحق اور زخمیوں میں خواتین اور بچے بھی شامل ہیں۔ اطلاع ملتے ہی ریسکیو اہلکار اور موٹر وے پولیس موقع پر پہنچ گئے اور امدادی کارروائیاں شروع کردیں۔زخمیوں اور لاشوں کو ڈی ایچ کیو اسپتال بٹ خیلہ منتقل کردیا گیا، جہاں بعض زخمیوں کی حالت تشویشناک بتائی جاتی ہے۔ذرائع کے مطابق حادثے کا شکار تمام افراد خانہ بدوش تھے جن کا تعلق سوات کی تحصیل بحرین سے ہے۔ پولیس کے مطابق واقعہ بظاہر تیز رفتاری کے باعث پیش آیا، تاہم مزید تحقیقات جاری ہیں۔
