پاکستان تحریک انصاف کے رہنما سہیل آفریدی خیبرپختونخوا کے نئے وزیراعلیٰ منتخب ہوگئے، انہوں نے 90 ووٹ حاصل کیے۔ نئے قائد ایوان کے انتخاب کے لیے خیبرپختونخوا اسمبلی کا اجلاس منعقد ہوا، جس میں پی ٹی آئی کے علی امین گنڈاپور سمیت پارٹی کے دیگر ارکان شریک ہوئے۔ اجلاس کے دوران وزیراعلیٰ کے انتخاب کا عمل مکمل کیا گیا، جس میں سہیل آفریدی واضح اکثریت سے کامیاب قرار پائے۔ پی ٹی آئی کے رکن آصف محسود بیرون ملک ہونے کے باعث ووٹنگ میں شریک نہیں ہوسکے، جبکہ اپوزیشن جماعتوں نے خیبرپختونخوا اسمبلی کے اجلاس کا بائیکاٹ کیا، جس کے باعث انتخابی عمل میں صرف حکومتی اتحاد کے ارکان نے حصہ لیا۔ سہیل آفریدی کی کامیابی کے بعد اسمبلی کے ایوان میں پی ٹی آئی کے ارکان نے خوشی کا اظہار کیا اور ایک دوسرے کو مبارکباد دی۔ بعد ازاں اسپیکر خیبرپختونخوا اسمبلی بابر سلیم نے وزیراعلیٰ کے انتخاب کے لیے آئینی عمل شروع کرنے کا حکم دیتے ہوئے کہا کہ قائد ایوان کے انتخاب پر میں رولنگ دیتا ہوں، جو طریقہ کار اپنایا گیا وہ مکمل طور پر آئینی ہے۔ ان کا کہنا تھا کہ بطور اسپیکر اس ایوان میں وزیراعلیٰ کا انتخاب میری آئینی ذمہ داری ہے، علی امین گنڈاپور کا استعفیٰ اور نئے قائد ایوان کا انتخاب آئین و قانون کے مطابق انجام پایا ہے۔ خیال رہے کہ سہیل آفریدی کے مدمقابل جے یو آئی (ف) کے مولانا لطف الرحمان، مسلم لیگ (ن) کے سردار شاہجہاں یوسف اور پیپلز پارٹی کے ارباب زرک خان بھی میدان میں تھے۔
