شرم الشیخ ایئرپورٹ پر مصر کے وزیرِ کھیل و نوجوانان ڈاکٹر اشرف صبحي، پاکستان کے سفیر عامر شوکت اور مصری اعلیٰ سفارتی عملے نے وزیراعظم کا پرتپاک استقبال کیا۔
وزیراعظم شہباز شریف شرم الشیخ میں غزہ میں جنگ بندی کے لیے منعقدہ امن سربراہی اجلاس میں شرکت کریں گے۔ اس موقع پر نائب وزیراعظم و وزیرِ خارجہ اسحاق ڈار اور وفاقی وزیرِ اطلاعات عطا تارڑ بھی وزیراعظم کے ہمراہ ہیں۔یاد رہے کہ شہباز شریف امریکی صدر ڈونلڈ ٹرمپ، مصری صدر عبدالفتاح السیسی، امیرِ قطر شیخ تمیم بن حمد الثانی اور ترک صدر رجب طیب اردوان کے ہمراہ غزہ امن معاہدے پر دستخط کی تقریب میں خصوصی طور پر شرکت کریں گے۔یہ اجلاس صدر ٹرمپ، وزیراعظم شہباز شریف اور عرب و اسلامی ممالک کے رہنماؤں کی ان کوششوں کا تسلسل ہے جو انہوں نے اقوام متحدہ کی جنرل اسمبلی کے موقع پر غزہ میں جنگ بندی کے لیے کی تھیں۔اجلاس کے موقع پر جاری مشترکہ اعلامیے میں وزیراعظم شہباز شریف سمیت کئی ممالک کے سربراہان نے امریکی صدر کے پیش کردہ غزہ میں پائیدار امن، ترقی اور انسانی تحفظ کے منصوبے کا خیرمقدم کیا۔پاکستان کو امید ہے کہ اس امن معاہدے کے بعد غزہ میں ظلم و جبر کا خاتمہ، اسرائیلی افواج کی واپسی، فلسطینی قیدیوں کی رہائی اور متاثرہ علاقوں کی بحالی ممکن ہو سکے گی۔اسلام آباد کا مؤقف ہے کہ یہ قدم نہ صرف مشرقِ وسطیٰ میں دیرپا امن کے قیام کا باعث بنے گا بلکہ اقوامِ متحدہ کی قراردادوں کے مطابق 1967 سے پہلے کی سرحدوں پر مبنی ایک آزاد فلسطینی ریاست کے قیام کی راہ بھی ہموار کرے گا، جس کی دارالحکومت القدس الشریف ہوگا۔
