پاکستان تحریک انصاف (پی ٹی آئی) کے بانی چیئرمین عمران خان کی بہن علیمہ خان کے خلاف عدالت نے گرفتاری کے وارنٹ جاری کرتے ہوئے انہیں 11 اکتوبر کو گرفتار کر کے پیش کرنے کا حکم دے دیا۔تفصیلات کے مطابق، راولپنڈی کی انسدادِ دہشت گردی عدالت میں صادق آباد تھانے میں درج 26 نومبر احتجاج کیس کی سماعت ہوئی، جس میں عدالت نے علیمہ خان کے گرفتاری وارنٹ جاری کر دیے۔کیس کی سماعت جج امجد علی شاہ نے کی۔ آج کی سماعت میں علیمہ خان پر فردِ جرم عائد کی جانی تھی، تاہم وہ عدالت میں پیش نہ ہو سکیں، جس پر عدالت نے ان کے گرفتاری وارنٹ جاری کیے۔اسی کیس میں شامل دیگر 6 ملزمان عدالت میں پیش ہوئے، جن پر فردِ جرم عائد کی گئی، لیکن انہوں نے الزامات تسلیم کرنے سے انکار کر دیا۔عدالت نے علیمہ خان پر فردِ جرم عائد کرنے کے لیے نئی تاریخ 11 اکتوبر مقرر کر دی۔
