سلام آباد: وزیراعظم کے مشیر رانا ثنااللہ نے کہا ہے کہ شہباز شریف خود مریم نواز کو وزیراعظم کا حلف تھمائیں گے، اس میں کوئی شک نہیں کہ مریم نواز تیاری کر رہی ہیں اور وہ مستقبل کی وزیراعظم بنیں گی۔اے آر وائی نیوز کے پروگرام خبر میں گفتگو کرتے ہوئے رانا ثنااللہ نے کہا کہ یہ سب تب ممکن ہے جب شہباز شریف سمجھیں گے کہ اب پارٹی کی اگلی نسل کو آنا ہے۔انہوں نے کہا کہ شہباز شریف کی کارکردگی کو دیکھتے ہوئے یہ بھی ممکن ہے کہ وہ خود دوبارہ وزیراعظم کے امیدوار ہوں۔ایک سوال کے جواب میں رانا ثنااللہ نے انکشاف کیا کہ محسن نقوی صدر آصف زرداری کے منہ بولے بیٹے ہیں، اور وہ خود اس بات کا اعتراف کرتے ہیں۔انہوں نے بتایا کہ محسن نقوی کی صدر آصف زرداری سے ملاقاتیں ہوتی رہتی ہیں، اور جب بھی وہ ایوان صدر جاتے ہیں تو محسن نقوی وہاں موجود ہوتے ہیں۔ان کا کہنا تھا کہ انہیں معلوم نہیں کہ صدر آصف زرداری نے محسن نقوی کو کیوں بلایا ہے۔رانا ثنااللہ نے مزید کہا کہ سیاسی گرما گرمی میں صدر آصف زرداری اور نواز شریف ہی اہم کردار ادا کر سکتے ہیں۔انہوں نے کہا کہ پہلے بھی کہا تھا کہ محسن نقوی کی مہربانی ہے، ورنہ وہ خود وزیراعظم بن سکتے تھے۔ان کا کہنا تھا کہ اب صورتحال تبدیل ہو چکی ہے، شہباز شریف کی کارکردگی ایسی ہے کہ کوئی ان تک نہیں پہنچ سکتا۔رانا ثنااللہ کے مطابق الیکشن سے پہلے نواز شریف مسلم لیگ ن کے ڈیکلیئرڈ وزیراعظم کے امیدوار تھے، تاہم الیکشن کے بعد انہوں نے کہا کہ اگر اکثریت نہ ہوئی تو وزیراعظم نہیں بنوں گا، اور پارٹی اجلاس میں خواہش ظاہر کی کہ شہباز شریف وزیراعظم بنیں۔رانا ثنااللہ نے مزید کہا کہ نواز شریف، شہباز شریف یا پارٹی کبھی بھی فیصلہ کر سکتی ہے کہ کون کس عہدے پر ہوگا۔انہوں نے کہا کہ اس میں کوئی شک نہیں کہ مریم نواز ہماری مستقبل کی لیڈر ہیں۔رانا ثنااللہ نے واضح کیا کہ اگر نواز شریف فیصلہ کر لیں کہ وزیراعظم بننا ہے تو کوئی رکاوٹ نہیں ہوگی، شہباز شریف وزارتِ عظمیٰ ان کے قدموں میں رکھ دیں گے۔انہوں نے کہا کہ بات بگڑی نہیں، مریم نواز وزیراعلیٰ پنجاب ہیں، کوئی عثمان بزدار نہیں، وہ اپنے صوبے کی بات کرتی ہیں۔ان کے بقول مریم نواز نے پیپلز پارٹی کو نشانہ نہیں بنایا، بلکہ ان لوگوں کی بات کی جو پنجاب کی ترقی سے حسد کرتے ہیں، اور اگر کوئی مس لیڈ کر رہا ہے تو اس کا بندوبست کیا جائے گا۔
