اسلام آباد: پی ٹی آئی کے بانی عمران خان کو 190 ملین پاؤنڈ نیب کیس میں سزا سنانے والے جج کی تقرری کو اسلام آباد ہائی کورٹ میں چیلنج کر دیا گیا ہے۔تفصیلات کے مطابق، شہری اسامہ ریاض نے وکیل ریاض حنیف راہی کے ذریعے جج ناصر جاوید رانا کی تقرری کے خلاف درخواست دائر کی۔ رجسٹرار آفس نے درخواست وصول کر کے اس پر ڈائری نمبر بھی لگا دیا۔درخواست میں عدالت سے استدعا کی گئی ہے کہ درخواست پر فیصلے تک جج ناصر جاوید رانا کو کام سے روکا جائے، اور سپریم کورٹ کے 19 اکتوبر 2024 کے حکم نامے کی روشنی میں ان کی تقرری کا نوٹیفکیشن کالعدم قرار دیا جائے۔مزید یہ بھی استدعا کی گئی ہے کہ اگر درخواست پر فیصلہ ہونے سے قبل ریٹائرمنٹ ہو جائے تو 14 دسمبر 2022 کے بعد حاصل کی گئی مراعات اور واجبات واپس لیے جائیں، اور ریٹائرمنٹ کے بعد انہیں کسی پنشن یا دیگر فوائد کا حق دار نہ ٹھہرایا جائے۔
