سابق سینیٹر اور رہنما جماعت اسلامی پاکستان مشتاق احمد خان اسرائیلی قید سے رہا ہو کر اردن پہنچ گئے ہیں۔نائب وزیر اعظم و وزیر خارجہ اسحاق ڈار نے تصدیق کی ہے کہ گلوبل صمود فلوٹیلا میں شامل سابق سینیٹر مشتاق احمد خان کو رہا کر دیا گیا ہے۔اسحاق ڈار کے مطابق وہ اس وقت اردن میں پاکستانی سفارتخانے میں موجود ہیں۔نائب وزیر اعظم و وزیر خارجہ اسحاق ڈار نے بتایا ہے کہ سابق سینیٹر مشتاق احمد خان کی صحت بہتر ہے اور ان کا حوصلہ بلند ہے۔انہوں نے کہا کہ مشتاق احمد خان اس وقت اردن میں پاکستانی سفارتخانے میں محفوظ ہیں، جہاں سفارتخانہ ان کی خواہش اور سہولت کے مطابق پاکستان واپسی میں مدد دینے کو تیار ہے۔اسحاق ڈار نے تمام دوست ممالک کا شکریہ ادا کرتے ہوئے کہا کہ وزارتِ خارجہ کے ساتھ تعاون اور مدد کرنے پر ہم ان کے مشکور ہیں۔
دوسری جانب، مشتاق احمد خان کے آفیشل فیس بک اکاؤنٹس سے جاری ویڈیو میں بھی ان کی اسرائیلی قید سے رہائی اور اردن پہنچنے کی تصدیق کی گئی ہے۔واضح رہے کہ مشتاق احمد خان گلوبل صمود فلوٹیلا میں شامل تھے، جو غزہ کے فلسطینیوں کی مدد کے لیے اسپین سے روانہ ہوا تھا، تاہم اسرائیلی بحریہ نے کارکنوں کو منزل تک پہنچنے سے قبل ہی گرفتار کر لیا تھا۔
