الیکشن کمیشن نے صوبہ خیبر پختونخوا سے سینیٹ کی جنرل نشست پر انتخاب کا شیڈول جاری کر دیا ہے۔
یہ نشست پاکستان تحریک انصاف (پی ٹی آئی) کے رہنما شبلی فراز کی نااہلی کے باعث خالی ہوئی تھی، جس پر کاغذات نامزدگی 8 سے 9 اکتوبر تک جمع کروائے جا سکیں گے، جبکہ امیدواروں کے نام 10 اکتوبر کو شائع کیے جائیں گے۔شیڈول کے مطابق کاغذات کی جانچ پڑتال 13 اکتوبر تک مکمل ہوگی، اور منظوری یا مستردگی کے خلاف اپیلیں 15 اکتوبر تک دائر کی جا سکیں گی۔ ان اپیلوں پر فیصلے 17 اکتوبر تک سنائے جائیں گے۔امیدواروں کی نظرثانی شدہ فہرست 18 اکتوبر کو جاری ہوگی، اور امیدوار 20 اکتوبر تک کاغذات واپس لے سکیں گے۔ سینیٹ کی خالی نشست پر انتخاب 30 اکتوبر کو ہوگا۔
یاد رہے کہ چند دن قبل الیکشن کمیشن نے پی ٹی آئی سے تعلق رکھنے والے قومی اسمبلی میں اپوزیشن لیڈر عمر ایوب اور سینیٹ میں اپوزیشن لیڈر شبلی فراز سمیت دیگر رہنماوں کو نااہل قرار دیتے ہوئے نوٹیفکیشن جاری کیا تھا۔الیکشن کمیشن نے یہ فیصلہ اے ٹی سی فیصل آباد کے 9 مئی کے مقدمے میں پی ٹی آئی رہنماؤں کو دی گئی سزاؤں کے تناظر میں کیا تھا۔
