مسلم لیگ (ن) کے صدر نواز شریف نے پیپلز پارٹی اور پنجاب حکومت کے درمیان جاری تنازع پر وزیراعلیٰ پنجاب مریم نواز کی مکمل حمایت کردی ہے۔
ذرائع کے مطابق دو روز قبل جاتی امرا لاہور میں وزیراعظم شہباز شریف نے نواز شریف سے ملاقات کی۔ ملاقات میں صوبائی سطح پر بڑھتی ہوئی سیاسی کشیدگی پر تفصیلی تبادلہ خیال کیا گیا۔
ذرائع کا کہنا ہے کہ وزیراعظم نے تجویز دی کہ اگر مریم نواز اپنے بیانات میں نرمی اختیار کریں تو ممکن ہے کہ پیپلز پارٹی بھی محاذ آرائی سے گریز کرے۔
تاہم مسلم لیگ (ن) کے قائد نواز شریف نے اپنی بیٹی اور وزیراعلیٰ پنجاب مریم نواز کی حمایت کرتے ہوئے واضح کیا کہ ان کے حالیہ بیانات دراصل پیپلز پارٹی کی غیرضروری تنقید کا جواب ہیں، اور انہوں نے پنجاب کے عوام کی صحیح ترجمانی کی ہے۔نواز شریف کے مؤقف سامنے آنے کے بعد صوبائی وزیر اطلاعات سندھ شرجیل انعام میمن نے گزشتہ روز ایک سخت پریس کانفرنس کی اور ایک بار پھر مریم نواز کو تنقید کا نشانہ بنایا، جس کے نتیجے میں دونوں جماعتوں کے درمیان سیاسی درجہ حرارت مزید بڑھ گیا ہے۔
