راولپنڈی، لاہور، پشاور اور اٹک میں اے این ایف کی چھ کارروائیاں، بھاری مقدار میں منشیات ضبط

راولپنڈی : اینٹی نارکوٹکس فورس (اے این ایف) نے مختلف شہروں میں منشیات اسمگلنگ کے خلاف چھ کامیاب کارروائیوں کے دوران خاتون اور افغان شہری سمیت سات ملزمان کو گرفتار کر لیا۔
ترجمان اے این ایف ہیڈکوارٹر کے مطابق کارروائیوں میں 41 لاکھ روپے سے زائد مالیت کی 49.283 کلوگرام منشیات برآمد کی گئی،اسلام آباد ایئرپورٹ پر مسقط (عمان) جانے والے ایک مسافر کے پیٹ سے 683 گرام وزنی آئس سے بھرے 90 کیپسول برآمد ہوئے، جبکہ ایک اور کارروائی میں برطانیہ جانے والے مسافر کے سامان سے 8.5 کلوگرام وزنی 29,400 ڈایازیپام گولیاں پکڑی گئیں،مزید برآں، رنگ روڈ پشاور کے قریب گاڑی سے 500 گرام آئس برآمد کر کے ایک افغان شہری کو گرفتار کیا گیا۔ اسی طرح بحریہ ٹاؤن لاہور کے قریب ایک کار اور موٹرسائیکل سوار سے 30 کلوگرام چرس برآمد ہوئی اور دو افراد کو حراست میں لیا گیا،اقبال شہید ٹول پلازہ اٹک کے قریب ایک ٹرک سے 7.2 کلوگرام چرس برآمد کر کے ملزم کو گرفتار کیا گیا، جبکہ موٹروے ٹول پلازہ پشاور کے قریب ایک خاتون کے قبضے سے 2.4 کلوگرام چرس برآمد کی گئی،ترجمان نے مزید بتایا کہ تمام کارروائیوں کے بعد انسداد منشیات ایکٹ 1997 کے تحت مقدمات درج کر کے تحقیقات شروع کر دی گئی ہیں۔