وزارت خارجہ کے ذرائع کے مطابق سعودی ولی عہد محمد بن سلمان رواں سال پاکستان کا دورہ کریں گے، جس کی تاریخیں طے کی جارہی ہیں۔ بتایا جارہا ہے کہ سعودی ولی عہد 31 دسمبر سے پہلے پاکستان کا دورہ کریں گے۔ پاک–سعودیہ دفاعی معاہدے کے بعد یہ دورہ خاص اہمیت رکھتا ہے،وزیراعظم شہباز شریف کے حالیہ دورۂ سعودیہ کے دوران پاکستان اور سعودی عرب کے درمیان بڑا اسٹریٹیجک دفاعی معاہدہ طے پایا تھا۔ دونوں رہنماؤں نے معاہدے پر دستخط کیے جو دونوں ممالک کی سلامتی بڑھانے اور خطے میں امن و استحکام کے حصول کے لیے مشترکہ عزم کی عکاسی کرتا ہے،جاری اعلامیہ کے مطابق معاہدے کا مقصد کسی بھی جارحیت کیخلاف مشترکہ دفاع اور تحفظ کو یقینی بنانا ہے۔ کسی ملک کیخلاف جارحیت دونوں ممالک کیخلاف جارحیت تصور ہوگی،وزیراعظم شہباز شریف اور سعودی ولی عہد محمد بن سلمان کی ملاقات عالمی توجہ کا مرکز بنی تھی، جس میں فیلڈ مارشل عاصم منیر، نائب وزیراعظم اسحاق ڈار اور دیگر وزرا بھی شریک تھے۔ ملاقات میں دوطرفہ تعلقات اور دفاعی تعاون پر تفصیلی گفتگو ہوئی اور سعودی ولی عہد نے پاکستان کو بھرپور تعاون کی یقین دہانی کرائی،اب اس اہم دفاعی معاہدے کے بعد سعودی ولی عہد کا مجوزہ دورہ پاکستان نہ صرف تاریخی اہمیت رکھتا ہے بلکہ اس کے دور رس نتائج بھی مرتب ہوں گے۔
