ایشیا کپ میں پاکستان کے خلاف میچ کے بعد بھارتی کرکٹ ٹیم کے کپتان سوریا کمار یادیو کو سیاسی بیان دینا مہنگا پڑ گیا ہے۔بھارتی میڈیا کے مطابق پاکستان کرکٹ بورڈ (پی سی بی) کی شکایت پر آئی سی سی نے نوٹس لیتے ہوئے معاملہ میچ ریفری رچی رچرڈسن کو بھجوا دیا ہے، جو الزامات کا جائزہ لے رہے ہیں۔رپورٹس کے مطابق، پاکستان کے خلاف گروپ مرحلے کے میچ کے بعد سوریا کمار یادیو نے پریزنٹیشن کے دوران متنازع اور سیاسی جملے کہے تھے۔ آئی سی سی کو جمع کرائے گئے شواہد کا ابتدائی جائزہ لینے کے بعد یہ کہا گیا ہے کہ بھارتی کپتان نے کھیل کے مفاد کے خلاف غیر مناسب ریمارکس دیے۔ بھارتی میڈیا کا کہنا ہے کہ ان کے خلاف جلد کارروائی کا امکان ہے۔واضح رہے کہ بھارتی کپتان نے پاکستان کے خلاف کامیابی کے بعد گفتگو کرتے ہوئے پہلگام واقعے کا ذکر کر کے سیاسی رنگ دینے کی کوشش کی تھی۔
