کراچی: گاڑی اور موٹر سائیکل مالکان ہوشیار ہوجائیں، شہرقائد میں ٹریفک قوانین کی خلاف ورزیوں پر اب ای چالان سسٹم نافذ ہونے والا ہے۔تفصیلات کے مطابق کراچی میں یکم اکتوبر سے الیکٹرک چالاننگ (ای چالان) سسٹم کا باضابطہ آغاز کیا جائے گا۔ اس نئے نظام کے تحت چالان ٹریفک پولیس اہلکار کے بجائے جدید خودکار نظام کے ذریعے کیے جائیں گے۔ٹریفک پولیس کی جانب سے شہر کی اہم شاہراہوں پر آگاہی مہم جاری ہے تاکہ شہریوں کو ای چالان سسٹم سے متعلق مکمل معلومات فراہم کی جاسکیں۔شہریوں نے اس اقدام کو خوش آئند قرار دیتے ہوئے کہا ہے کہ اس نظام سے رشوت ستانی اور امتیازی رویے کا خاتمہ ہوگا اور ٹریفک قوانین کی پاسداری کو یقینی بنایا جاسکے گا۔ڈی آئی جی ٹریفک پیر محمد شاہ کے مطابق کئی ماہ سے ذرائع ابلاغ اور سوشل میڈیا کے ذریعے عوام کو ای چالان سسٹم کے بارے میں آگاہی دی جارہی ہے تاکہ اس کے نفاذ کے بعد شہری مشکلات سے دوچار نہ ہوں۔
