پاکستان کے نائب صدر اور وزیرِ خارجہ اسحاق ڈار کی اقوام متحدہ کی جنرل اسمبلی کے اجلاس کے دوران شام کے صدر احمد الشرع سے اہم ملاقات ہوئی۔تفصیلات کے مطابق اسحاق ڈار نے سماجی رابطے کی ویب سائٹ ایکس پر اپنے پیغام میں بتایا کہ یہ ملاقات خوشگوار ماحول میں ہوئی، جس میں دونوں ممالک کے تعلقات کو مزید مضبوط بنانے پر بات چیت کی گئی۔ ان کا کہنا تھا کہ احمد الشرع تقریباً چھ دہائیوں میں جنرل اسمبلی میں شریک ہونے والے پہلے شامی سربراہ ہیں۔ ملاقات کے دوران پاکستان کی جانب سے شامی عوام کے ساتھ مکمل یکجہتی کا اظہار کیا گیا۔نائب صدر اسحاق ڈار نے کہا کہ تجارت، انسانی سرمائے اور ترقی سمیت مختلف شعبوں میں تعاون کے ذریعے پاکستان اور شام کی تاریخی دوستی کو مزید گہرا کرنے کے عزم کا اظہار کیا گیا ہے۔واضح رہے کہ اسحاق ڈار نے نیویارک میں اقوام متحدہ کے ہیڈکوارٹرز میں او آئی سی کی خصوصی تقریب میں بھی شرکت کی، جہاں انھوں نے فلسطین، کشمیر اور اسلاموفوبیا جیسے مسائل کو اجاگر کرتے ہوئے کہا کہ مسلمانوں کے ناقابلِ تنسیخ حقوق کے تحفظ کے لیے او آئی سی کو مزید فعال کردار ادا کرنا ہوگا۔ انھوں نے امتِ مسلمہ میں باہمی تقسیم کے خاتمے کی ضرورت پر بھی زور دیا۔اس موقع پر نائب صدر نے کینیڈا کی وزیرِ خارجہ انیتا آنند سے ملاقات میں اقتصادی و تجارتی تعلقات کو مزید فروغ دینے پر اتفاق کیا۔ اسی طرح کامن ویلتھ وزرائے خارجہ اجلاس میں خطاب کرتے ہوئے انھوں نے کہا کہ دنیا ایک ہی وقت میں تنازعات، ماحولیاتی آفات، اقتصادی مسائل اور ٹیکنالوجی کے چیلنجز سے دوچار ہے۔ ان کا کہنا تھا کہ ماحولیاتی بحران کئی رکن ممالک کے لیے سنگین خطرہ ہے، جبکہ پاکستان ماحولیاتی طور پر دنیا کے سب سے زیادہ کمزور ممالک میں شامل ہے۔
