واشنگٹن: امریکی محکمہ خارجہ نے برطانیہ، آسٹریلیا، کینیڈا اور دیگر اتحادیوں کی جانب سے فلسطینی ریاست کو تسلیم کرنے کے اعلان پر ردعمل دیتے ہوئے اس اقدام کو “نمائشی” قرار دیا ہے۔العربیہ اردو کے مطابق امریکی محکمہ خارجہ کے ترجمان نے کہا کہ ہمارا فوکس سنجیدہ سفارت کاری پر ہے، نمائشی اقدامات پر نہیں۔ ترجمان نے مزید کہا کہ امریکا کی ترجیحات واضح ہیں: یرغمالیوں کی رہائی، اسرائیل کی سلامتی، اور پورے خطے کے لیے امن و خوشحالی، جو حماس سے پاک ہونے پر ہی ممکن ہے۔یاد رہے کہ اتوار کے روز برطانیہ، آسٹریلیا، کینیڈا اور پرتگال نے فلسطینی ریاست کو تسلیم کیا تھا، جسے مغربی خارجہ پالیسی میں کئی دہائیوں بعد ایک بڑی تبدیلی قرار دیا جا رہا ہے۔ اس اقدام پر اسرائیل نے شدید ردعمل دیا جبکہ غزہ میں فلسطینی عوام نے اسے اپنی جدوجہد کی کامیابی کے طور پر خوش آمدید کہا۔اسرائیلی وزیراعظم بن یامین نیتن یاہو نے فلسطینی ریاست کے تسلیم کو “مضحکہ خیز” قرار دیتے ہوئے مسترد کر دیا اور دعویٰ کیا کہ یہ اسرائیل کے وجود کو خطرے میں ڈالے گا۔واضح رہے کہ فرانس سمیت مزید ممالک بھی اقوام متحدہ کی جنرل اسمبلی کے اجلاس کے دوران فلسطینی ریاست کو تسلیم کرنے کا اعلان کر سکتے ہیں۔
