اسلام آباد: پاکستان میں کل (23 ستمبر) کو عام تعطیل کے حوالے سے سوشل میڈیا پر پھیلنے والی خبروں کی وضاحت کر دی گئی ہے، جس کے باعث عوام، بالخصوص طلبہ اور سرکاری ملازمین میں پائی جانے والی بے چینی ختم ہو گئی ہے۔تفصیلات کے مطابق گزشتہ چند روز سے مختلف ویب سائٹس اور سوشل میڈیا پلیٹ فارمز پر یہ خبریں گردش کر رہی تھیں کہ 23 ستمبر کو پاکستان میں عام تعطیل ہو گی، جبکہ بعض واٹس ایپ گروپس میں جعلی “حکومتی نوٹیفکیشن” بھی شیئر کیا گیا، جس نے عوام کو مزید کنفیوژ کر دیا۔
اصل حقیقت یہ ہے کہ 23 ستمبر کو تعطیل صرف سعودی عرب میں ہے، پاکستان میں نہیں۔ سعودی عرب اپنا 95واں قومی دن منانے جا رہا ہے، جو ہر سال 23 ستمبر کو 1932 میں مملکت کے اتحاد کی یاد میں منایا جاتا ہے۔سعودی عرب کا قومی دن پہلی بار 1965 میں منایا گیا جبکہ 2005 میں اسے سرکاری تعطیل قرار دیا گیا۔ اس سال یہ دن “Pride in Our Nature” کے عنوان سے منایا جا رہا ہے، جس کے تحت سعودی عرب میں سرکاری دفاتر، تعلیمی ادارے اور بینک بند رہیں گے۔اس موقع پر سعودی فرمانروا شاہ سلمان بن عبدالعزیز اور ولی عہد محمد بن سلمان تقریبات کی قیادت کریں گے، جن میں مملکت کی تاریخ، سیاحت، منصوبہ نیوم اور معاشی ترقی کو اجاگر کیا جائے گا۔پاکستانی حکام نے واضح کیا ہے کہ ملک میں 23 ستمبر کو کسی قسم کی تعطیل نہیں ہوگی اور عوام سے اپیل کی گئی ہے کہ وہ افواہوں یا غیر مصدقہ خبروں پر یقین نہ کریں بلکہ صرف سرکاری اعلانات پر بھروسہ کریں۔
