کراچی: ملک بھر میں سونے کی قیمتوں میں بڑا اضافہ ریکارڈ کیا گیا ہے جس کے بعد فی تولہ سونا تاریخ کی نئی بلند ترین سطح پر جا پہنچا۔آل پاکستان جیمز اینڈ جیولرز ایسوسی ایشن کے مطابق فی تولہ سونا 3 ہزار 400 روپے مہنگا ہونے کے بعد 3 لاکھ 93 ہزار 700 روپے پر جا پہنچا۔ اسی طرح 10 گرام سونے کی قیمت 2 ہزار 915 روپے اضافے سے بڑھ کر 3 لاکھ 37 ہزار 534 روپے ہوگئی ہے۔عالمی مارکیٹ میں بھی سونے کی قیمت میں اضافہ دیکھنے میں آیا جہاں 17 ڈالرز اضافے کے بعد فی اونس سونا 3 ہزار 685 ڈالرز کی ریکارڈ سطح پر پہنچ گیا۔ماہرین کے مطابق سونا روایتی طور پر ایک محفوظ سرمایہ کاری سمجھا جاتا ہے جس کی طلب افراط زر، سیاسی یا معاشی غیر یقینی صورتحال کے دوران بڑھ جاتی ہے۔ صدیوں سے اسے کرنسی اور دولت کی شکل میں استعمال کیا جاتا رہا ہے اور جب سرمایہ کار دیگر اثاثوں پر اعتماد کھو دیتے ہیں تو سونے کی خریداری میں اضافہ ہوتا ہے۔واضح رہے کہ گزشتہ برس پاکستان میں سونے کی قیمت کے تعین کے طریقہ کار میں تبدیلی کی گئی تھی جس کے تحت اس کی قیمت انٹرنیشنل مارکیٹ ریٹ سے فی اونس 20 ڈالر زیادہ مقرر کی جاتی ہے۔
