لندن: برطانیہ میں کی جانے والی ایک تحقیق میں انکشاف ہوا ہے کہ بیٹا بلاکرز دوا دل کے دورے کے بعد بعض خواتین کے لیے نہ صرف نقصان دہ بلکہ مہلک بھی ثابت ہوسکتی ہے۔طبی ماہرین کے مطابق یہ دوا خاص طور پر ان خواتین کے لیے خطرناک ہے جن کا دل کا پمپنگ فنکشن برقرار رہتا ہے۔ تحقیق میں بتایا گیا ہے کہ اگر ایسے مریضوں کو بیٹا بلاکرز دی جائیں تو دوبارہ دل کا دورہ پڑنے، ہارٹ فیل ہونے اور حتیٰ کہ موت کے امکانات تین گنا تک بڑھ جاتے ہیں۔بیٹا بلاکرز ایسی دوا ہے جو دل اور خون کی نالیوں پر اثر انداز ہو کر دل کی دھڑکن کو سست اور بلڈ پریشر کو کم کرتی ہے۔یہ نتائج معروف طبی جرائد نیو انگلینڈ جرنل آف میڈیسن اور یورپی ہارٹ جرنل میں شائع ہوئے ہیں۔ تحقیق کے مطابق دل کے دورے کے بعد اگر مریض کا ایجیکشن فریکشن (دل کی پمپنگ صلاحیت) کم نہ ہو تو بیٹا بلاکرز کا استعمال فائدہ مند ہونے کے بجائے نقصان دہ ثابت ہوسکتا ہے۔تحقیق میں 1,627 خواتین کا تجزیہ کیا گیا، جس میں یہ واضح ہوا کہ بیٹا بلاکرز استعمال کرنے والی خواتین میں دل سے متعلق اموات کا خطرہ ان خواتین کے مقابلے میں 45 فیصد زیادہ تھا جو یہ دوا استعمال نہیں کر رہی تھیں۔ماہرین کا کہنا ہے کہ یہ نتائج اسپین اور اٹلی کے 109 اسپتالوں میں 8,500 مریضوں پر کیے گئے ایک بڑے کلینکل ٹرائل کے تحت حاصل ہوئے، جس سے یہ ثابت ہوا کہ وہ مریض (مرد و خواتین) جن کے دل کی کارکردگی 50 فیصد یا اس سے زیادہ ہو، ان کے لیے بیٹا بلاکرز کا کوئی فائدہ سامنے نہیں آیا۔
