امریکی صدر ڈونلڈ ٹرمپ نے ایک بار پھر دعویٰ کیا ہے کہ انہوں نے بھارت اور پاکستان کے درمیان ممکنہ جنگ کو تجارت کے ذریعے روک دیا۔غیرملکی خبر ایجنسی کے مطابق ورجینیا میں ایک تقریب سے خطاب کرتے ہوئے ڈونلڈ ٹرمپ نے کہا کہ اب تک وہ سات جنگیں رکوا چکے ہیں۔ ان کا کہنا تھا کہ انہوں نے رواں سال بھارت اور پاکستان کے درمیان تنازع کو حل کرنے میں اہم کردار ادا کیا ہے۔ٹرمپ نے کہا کہ “دنیا میں ہم ایک بار پھر وہ عزت حاصل کر رہے ہیں جو پہلے کبھی نہیں دیکھی گئی۔ ہم امن معاہدوں کو فروغ دے رہے ہیں اور جنگیں روک رہے ہیں۔”انہوں نے مزید کہا کہ بھارت اور پاکستان، تھائی لینڈ اور کمبوڈیا، آرمینیا اور آذربائیجان، کوسوو اور سربیا، اسرائیل اور ایران، مصر اور ایتھوپیا، روانڈا اور کانگو کے درمیان جنگیں روکی گئیں۔ ان کے بقول تقریباً 60 فیصد جنگیں تجارت کے ذریعے رکی ہیں۔ٹرمپ نے بھارت کے حوالے سے کہا کہ “میں نے کہا دیکھو، اگر تم لڑو گے تو ہم کوئی تجارت نہیں کریں گے۔ ان کے پاس ایٹمی ہتھیار ہیں، اس کے بعد وہ رک گئے۔”امریکی صدر نے یہ بھی کہا کہ اسرائیل اور ایران کے درمیان ممکنہ جنگ کو بھی انہوں نے روکا۔ انہوں نے یورپی ممالک پر تنقید کرتے ہوئے کہا کہ وہ اب بھی روس سے تیل خرید رہے ہیں، جو بند ہونا چاہیے۔ ٹرمپ کے مطابق مختلف ممالک پر ٹیرف عائد کرنے سے امریکا کو بڑا فائدہ ہو رہا ہے۔
