اسلام آباد: پاکستان تحریک انصاف (پی ٹی آئی) نے پاکستان اور سعودی عرب کے درمیان ہونے والے اہم دفاعی معاہدے کا خیر مقدم کیا ہے۔مرکزی سیکریٹری اطلاعات پی ٹی آئی شیخ وقاص اکرم نے سوشل میڈیا پلیٹ فارم ایکس پر جاری اپنے بیان میں کہا کہ یہ معاہدہ مشترکہ اسٹریٹجک مفادات اور بھائی چارے کی توثیق ہے۔ ان کے مطابق دونوں ممالک کے درمیان دفاعی تعاون سے خطے میں استحکام بڑھے گا جبکہ دوطرفہ تعلقات اور علاقائی سلامتی کو بھی تقویت ملے گی۔شیخ وقاص اکرم نے کہا کہ بانی پی ٹی آئی عمران خان نے پاکستان کو مسلم دنیا کا اتحاد تصور کیا، پی ٹی آئی مسلم اتحاد اور اجتماعی سلامتی کو اہمیت دیتی ہے۔ انہوں نے زور دے کر کہا کہ حرمین الشریفین کا تقدس پاکستانی عوام کے عقیدے کا بنیادی جزو ہے۔مرکزی ترجمان نے مزید کہا کہ پاکستانی عوام سعودی حمایت کو قدر کی نگاہ سے دیکھتے ہیں اور پاک سعودی تعاون خطے میں امن و خوشحالی کا باعث بنے گا۔
