نیشنل ڈیٹابیس اینڈ رجسٹریشن اتھارٹی (نادرا) نے کراچی کے شہریوں کی سہولت کے لیے مزید میگا سینٹرز قائم کرنے کا فیصلہ کیا ہے۔میڈیا رپورٹس کے مطابق نادرا کے ڈائریکٹر جنرل سندھ عامر علی خان نے کراچی یونیورسٹی میں ایک تقریب سے خطاب کرتے ہوئے اعلان کیا کہ مارچ 2026 تک شہر میں تین نئے میگا سینٹرز قائم کیے جائیں گے۔ان کے مطابق یہ میگا سینٹرز گلشن اقبال، گلبرگ اور سرجانی ٹاؤن میں قائم کیے جائیں گے تاکہ عوام کو زیادہ سے زیادہ سہولت فراہم کی جا سکے۔عامر علی خان نے کہا کہ نادرا ہمیشہ شہریوں کے مسائل ٹیکنالوجی کے ذریعے حل کرنے کی کوشش کرتا رہا ہے اور اب شہری اپنے موبائل فونز کے ذریعے زیادہ تر خدمات حاصل کرسکتے ہیں۔ انہوں نے بتایا کہ پاک آئی ڈی ایپ کے ذریعے صارفین گھر بیٹھے کئی سہولیات تک رسائی حاصل کرسکتے ہیں، جس سے وقت اور محنت دونوں کی بچت ہوگی۔ڈائریکٹر جنرل سندھ نے مزید کہا کہ طلبہ اور نوجوان نادرا کی نئی خدمات سے متعلق شعور اجاگر کرنے میں اہم کردار ادا کرسکتے ہیں۔
