پاکستان اور فلسطین کے درمیان صحت کے شعبے میں تعاون کو فروغ دینے کے لیے معاہدہ طے پایا، جس کے تحت مفاہمتی یادداشت (MoU) پر دستخط کیے گئے۔
وزارت صحت کے ترجمان کے مطابق پاکستان کی جانب سے وفاقی وزیر صحت مصطفی کمال اور فلسطین کی جانب سے سفیر نے معاہدے پر دستخط کیے۔ تقریب میں وفاقی سیکرٹری صحت حامد یعقوب، ایڈیشنل سیکرٹری صحت اور ڈی جی ہیلتھ بھی موجود تھے۔وفاقی وزیر صحت مصطفی کمال نے کہا کہ معاہدے کی عملی شکل دینے کے لیے آئندہ 30 دنوں میں “پاکستان-فلسطین ہیلتھ ورکنگ گروپ” قائم کیا جائے گا جو دونوں ممالک کے درمیان تعاون کو رہنمائی فراہم کرے گا۔ جدید طبی شعبوں میں استعداد کار بڑھانے پر خصوصی توجہ دی جائے گی۔مصطفی کمال نے کہا کہ انٹر وینشنل کارڈیالوجی، آرگن ٹرانسپلانٹ، آرتھوپیڈک سرجری، اینڈوسکوپک، الٹراساؤنڈ، برن اور پلاسٹک سرجری کے شعبوں میں باہمی تعاون کیا جائے گا۔ اس کے علاوہ متعدی امراض، آنکھوں کی بیماریوں اور فارماسیوٹیکل شعبے میں بھی تعاون کو فروغ دیا جائے گا اور مشترکہ تحقیق کے مواقع تلاش کیے جائیں گے۔وزیر صحت نے کہا کہ معاہدے کا مقصد دونوں برادر ممالک کی عوام کی صحت کو بہتر بنانا ہے، اور پاکستان اپنے فلسطینی بھائیوں اور بہنوں کی فلاح کے لیے ہر ممکن تعاون جاری رکھے گا۔فلسطینی سفیر نے وزیر صحت کا شکریہ ادا کیا اور کہا کہ فلسطین اور پاکستان دونوں برادر ملک ہیں، اور دونوں ملکوں کی عوام کی صحت کی بہتری کے لیے مشترکہ اقدامات کریں گے۔
