وزیراعظم شہباز شریف سعودی عرب کے سرکاری دورے پر روانہ ہو گئے ہیں، جہاں وہ سعودی ولی عہد محمد بن سلمان سے ملاقات کریں گے۔دفتر خارجہ کے ترجمان کے مطابق سعودی ولی عہد کی دعوت پر یہ دورہ کیا جا رہا ہے۔ وزیراعظم کے ہمراہ نائب وزیراعظم اسحاق ڈار، وفاقی وزرا خواجہ آصف، محمد اورنگزیب، عطاء تارڑ، مصدق ملک اور معاون خصوصی طارق فاطمی بھی موجود ہیں۔ملاقات کے دوران پاکستان اور سعودی عرب کے تعلقات کے تمام پہلوؤں کا جائزہ لیا جائے گا، دو طرفہ تعاون کے نئے مواقع پر غور کیا جائے گا، اور علاقائی و عالمی امور پر بھی تبادلہ خیال کیا جائے گا۔سفارتی ذرائع کے مطابق سعودی عرب کے دورے کے بعد وزیراعظم برطانیہ جائیں گے، جہاں وہ دو روز قیام کریں گے اور برطانوی حکام سے ملاقاتیں کریں گے۔ اس دوران سابق وزیراعظم نواز شریف سے ملاقات بھی متوقع ہے۔ذرائع نے مزید بتایا کہ وزیراعظم 21 ستمبر کو برطانیہ سے امریکہ روانہ ہوں گے، جہاں نیویارک میں اقوام متحدہ کی جنرل اسمبلی کے اجلاس میں شرکت کریں گے اور 26 ستمبر کو جنرل اسمبلی سے خطاب کریں گے۔
وزیراعظم 22 ستمبر کو فلسطین کے دو ریاستی حل پر ہونے والی سربراہی کانفرنس میں بھی شریک ہوں گے، اور 27 ستمبر کو امریکہ سے براستہ برطانیہ وطن واپس روانہ ہوں گے۔ وہ 29 ستمبر کو پاکستان پہنچیں گے۔
