اسلام آباد: حکومت نے اعلان کیا ہے کہ سیلاب متاثرین کے لیے اگلے 24 سے 48 گھنٹوں میں ریلیف پیکج پیش کیا جائے گا۔تفصیلات کے مطابق سیکریٹری پاور ڈویژن نے قومی اسمبلی کی قائمہ کمیٹی برائے توانائی کو بریفنگ دیتے ہوئے بتایا کہ سیلاب متاثرہ علاقوں میں بجلی کے بلوں میں ریلیف دینے کے اقدامات کیے جا رہے ہیں اور ایک دو روز میں ریلیف کے متعلق تفصیلات سامنے آئیں گی۔سیکریٹری پاور ڈویژن فخر عالم عرفان نے کہا کہ متاثرہ علاقوں میں ریلیف کے لیے آئی ایم ایف کے ساتھ بھی رابطے میں ہیں اور وزارت خزانہ کے ساتھ بات چیت جاری ہے۔انہوں نے مزید کہا کہ گزشتہ سال بجلی کے شعبے میں 640 ارب روپے کے ہدف کے مقابلے میں 397 ارب روپے کا نقصان ہوا، جبکہ رواں مالی سال کے لیے نقصانات کا ہدف 540 ارب روپے مقرر کیا گیا ہے۔سیکریٹری نے بتایا کہ ہیسکو اور سیپکو کے بورڈز کی تنظیم نو آئندہ چند روز میں مکمل کر دی جائے گی، بورڈز میں اکثریت پرائیویٹ سیکٹر کے ممبران کی ہوگی اور نجی شعبے سے ماہرین کی خدمات بھی شامل کی جائیں گی۔
