قومی ایئرلائن پی آئی اے 20 ارب 39 کروڑ روپے کے بقایا جات وصول کرنے میں ناکام رہی، آڈیٹر جنرل آف پاکستان نے اس معاملے پر سخت اعتراض اٹھا دیا۔آڈٹ رپورٹ کے مطابق دسمبر 2024 میں اس کی نشاندہی کی گئی تھی تاہم مؤثر اقدامات نہ ہونے کے باعث اب تک ریکوری نہیں ہوسکی۔رپورٹ میں کہا گیا کہ 2019-20 سے بقایا جات کے آڈٹ پیراز موجود ہیں، لیکن ای سی سی اور ایوی ایشن ڈویژن کے ساتھ کئی اجلاسوں کے باوجود رقم کی وصولی ممکن نہیں بن سکی۔آڈٹ کے مطابق 30 جون 2024 تک واجبات ادا نہیں ہوئے، جبکہ پی آئی اے نے اس مسئلے کے حل کے لیے کوئی مؤثر حکمتِ عملی اختیار نہیں کی۔آڈیٹرز نے سفارش کی ہے کہ معاملہ براہِ راست ایوی ایشن ڈویژن کے ذریعے حل کر کے واجب الادا رقم کی وصولی کو یقینی بنایا جائے۔
