مانسہرہ: وفاقی وزیر برائے مذہبی امور سردار محمد یوسف نے کہا ہے کہ ملک میں انتظامی طور پر نئے صوبوں کا قیام وقت کی اہم ضرورت ہے، جبکہ انہوں نے صوبہ ہزارہ کے قیام کے لیے جدوجہد تیز کرنے کا اعلان کیا ہے۔ اے آر وائی نیوز کے مطابق مانسہرہ میں جلسے سے خطاب کرتے ہوئے سردار محمد یوسف نے کہا کہ تحریک صوبہ ہزارہ کے دوران 7 نوجوان اپنی جانوں کا نذرانہ پیش کر چکے ہیں، اب صوبہ ہزارہ محض ایک مطالبہ نہیں بلکہ پاکستان کی ضرورت بن چکا ہے موجودہ صوبائی ڈھانچے پر تنقید وفاقی وزیر کا کہنا تھا کہ قیام پاکستان کے وقت ساڑھے تین کروڑ کی آبادی کے لیے صرف چار صوبے تھے، لیکن آج 25 کروڑ کی آبادی کے باوجود ملک میں اب بھی صرف چار صوبے ہیں انہوں نے کہا کہ جہاں انتظامی ضرورت ہو وہاں نئے صوبے قائم کیے جائیں اور قومی اسمبلی و سینیٹ میں اس حوالے سے بل پر بحث کی جائے۔ ہر آئینی ترمیم میں صوبہ ہزارہ کو شامل کرنے کا مطالبہ سردار محمد یوسف نے زور دیا کہ آئندہ ہر آئینی ترمیم میں صوبہ ہزارہ کو شامل کیا جائے تاکہ عوام کی دیرینہ خواہش پوری ہو سکے۔ نئے صوبوں پر سیاسی بحث واضح رہے کہ اس وقت ملک میں نئے صوبوں کے قیام کے حوالے سے سیاسی حلقوں میں بحث جاری ہے۔ ایم کیو ایم پاکستان اور یونائیٹڈ بزنس گروپ اس کی حمایت کر رہے ہیں جبکہ پاکستان پیپلز پارٹی حسبِ روایت مخالفت کر رہی ہے۔
