گورنر سندھ نے کراچی کی پہچان کو خوبصورتی سے بیان کرتے ہوئے کہا ہے کہ یہاں کے لوگ ایک دوسرے کو بھائی کہتے ہیں۔ ان کا کہنا تھا کہ شہر اور پورے سندھ کو امن کا گہوارہ بنانے کا ان کا خواب ہے اور اس مقصد کے لیے گورنر ہاؤس کے دروازے سب کے لیے دن رات کھلے ہیں۔ انہوں نے واضح کیا کہ وہ ایسی سیاست کے حامی نہیں جو شہر میں انتشار پھیلائے۔ انہوں نے بانی ایم کیو ایم کا نام لیے بغیر سخت الفاظ میں کہا کہ وہ کسی ایسے شخص کے ساتھ نہیں جو 9 مئی کے واقعات یا پاکستان مخالف نعروں میں ملوث ہو۔ انہوں نے مزید کہا کہ اگر کوئی غلط فہمی ہے تو اسے دور کر لینا چاہیے کہ بانی متحدہ کا اب ایم کیو ایم پاکستان کی سیاست سے کوئی تعلق نہیں ہے اور پارٹی بھی انہیں تسلیم نہیں کرتی۔ گورنر نے پرجوش انداز میں کہا کہ ان کا عزم “پاکستان زندہ باد” کے نعرے کے ساتھ ہے اور وہ ہر اس شخص سے دور ہیں جو ملک مخالف سوچ رکھتا ہو۔ آخر میں انہوں نے ایک خوشخبری سنائی کہ اس سال کراچی کو 20 ارب روپے مزید دیے جا رہے ہیں جس سے شہر کی گلیوں کی قسمت بدل جائے گی، اور ان کا اصل مقصد بھی یہی ترقی ہے، نہ کہ سیاست۔
