“ہم بیٹھے ہوئے تھے کہ اچانک زلزلے کی طرح محسوس ہوا، پاکستانی شہریوں نے بھارتی حملے کا آنکھوں دیکھا حال سنا دیا۔”

مریدکے کے دور افتادہ علاقے ننگل شاہدان کے رہائشیوں کا کہنا ہے کہ بھارت نے مقامی مسجد اور اس کے اردگرد ایک کے بعد ایک چار حملے کیے۔ رہائشیوں کے مطابق جس مسجد اور مدرسے پر بھارت نے حملہ کیا، ہم اسی کے قریب رہتے ہیں۔ علاقے کے لوگوں کا کہنا ہے کہ پہلے ایک دھماکہ ہوا، جس کے بعد مزید تین دھماکوں کی آوازیں سنائی دیں۔ مقامی رہائشی عثمان نے نجی چینل سے گفتگو کرتے ہوئے بتایا کہ علاقے کے عوام کے حوصلے بلند ہیں، ہم پاک فوج کے شانہ بشانہ کھڑے ہیں۔ بھارت کو اس کی زبان میں جواب دیا جائے گا۔ بھارت نے اپنی بزدلانہ کارروائی میں سویلین آبادی کو نشانہ بنایا ہے۔ مظفرآباد کے علاقے شوائی سے نقل مکانی کرنے والے ایک خاندان نے بتایا کہ ہم سو رہے تھے کہ اچانک زلزلے جیسا جھٹکا محسوس ہوا، جس کے بعد ہم خوف کے عالم میں گھروں سے باہر نکل آئے۔ یاد رہے کہ بھارتی فوج کے اس بزدلانہ حملے میں دو مساجد شہید ہو گئیں، جبکہ ایک بچے سمیت 13 پاکستانی شہید اور 36 زخمی ہو گئے۔ پاک فوج نے بھارتی کارروائیوں کا بھرپور جواب دیتے ہوئے بھارتی فضائیہ کے 3 رافیل، ایک سکوی، ایک مگ-29 اور ایک ڈرون کو تباہ کر دیا۔ اس کے ساتھ ساتھ بھارتی فوج کا بریگیڈ ہیڈکوارٹر بھی تباہ کر دیا گیا۔ پاک فوج کے شدید حملوں کے بعد بھارت نے لائن آف کنٹرول پر سفید جھنڈا لہرا کر اپنی شکست تسلیم کر لی۔