کراچی میں ہولناک سازش بے نقاب: انچولی کے شہری کے قتل میں ملوث تین ٹارگٹ کلرز گرفتار
کراچی کی ڈسٹرکٹ سینٹرل پولیس نے کامیاب کارروائی کے دوران تین خطرناک ٹارگٹ کلرز کو گرفتار کرلیا ہے، جنہوں نے شہر کے امن کو تباہ کرنے کی خوفناک سازش کا اعتراف کیا۔ یہ گرفتاری اس وقت عمل میں آئی جب انچولی میں ایک شہری کے قتل کی تحقیقات میں حیران کن انکشافات سامنے آئے۔
ایس ایس پی ذیشان صدیقی کے مطابق، یہ قاتل 13 نومبر کو انچولی کے علاقے میں قتل کی واردات میں ملوث ہیں۔ گرفتار افراد کے نام منظر عباس، آصف، اور منور ہیں، جنہوں نے مقتول کی کئی دن تک ریکی کے بعد اپنے ہدف کو انجام دیا۔
پولیس کا کہنا ہے کہ ان ٹارگٹ کلرز کا تعلق ایک پڑوسی ملک کی کالعدم تنظیم سے ہے، جو بین الاقوامی نیٹ ورک کے ذریعے کراچی میں کارروائیاں کرواتی ہے۔ ملزمان نے تسلیم کیا کہ انہیں بیرون ملک موجود عناصر سے ہدایات ملتی تھیں اور واردات کے بعد فرار کے لیے مکمل منصوبہ بندی کی گئی تھی۔
ملزم منظر عباس نے انکشاف کیا کہ قتل سے پہلے تین دن تک مقتول کی نگرانی کی گئی، اور ایک ساتھی کی نشاندہی پر گولیوں کا نشانہ بنایا گیا۔ منصوبے کے تحت قتل کے بعد مقتول کا موبائل فون بھی چھیننا تھا، مگر پولیس کی تیزی نے ان کے منصوبے ناکام بنادیے۔
گرفتار ملزمان کے اعترافی بیانات اور دیگر شواہد کے ذریعے یہ واضح ہوچکا ہے کہ کراچی کو ایک بار پھر بدامنی کی آگ میں دھکیلنے کی کوشش کی جارہی تھی، جسے قانون نافذ کرنے والے اداروں نے اپنی بروقت کارروائی سے ناکام بنا دیا۔ ان انکشافات نے نہ صرف عوام کو جھنجھوڑ کر رکھ دیا ہے بلکہ ایک بار پھر شہر میں دہشت گرد نیٹ ورکس کے خاتمے کی ضرورت کو بھی اجاگر کیا ہے۔
