معیشت میں بہتری کی نوید: وزیر خزانہ محمد اورنگزیب کی پُراعتماد پریس کانفرنس
وفاقی وزیر خزانہ محمد اورنگزیب نے نیوز کانفرنس میں کہا کہ پاکستان کی معیشت استحکام کی جانب گامزن ہے، حکومتی اصلاحات کے نتیجے میں مہنگائی اور شرح سود میں بتدریج کمی آ رہی ہے۔ انہوں نے دعویٰ کیا کہ عالمی مالیاتی فنڈ (آئی ایم ایف) اور دیگر مالیاتی اداروں کے ساتھ مسلسل رابطے پاکستان پر اعتماد کو بڑھا رہے ہیں۔
وزیر خزانہ نے آئی ایم ایف کی تعریف کرتے ہوئے کہا کہ 14 ماہ کے اندر خسارے کو سرپلس میں لانا ایک اہم کامیابی ہے، اور زرمبادلہ کے ذخائر میں بھی نمایاں اضافہ ہو رہا ہے۔ انہوں نے مزید بتایا کہ وزیراعظم شہباز شریف جلد عوام کے ساتھ معاشی روڈ میپ شیئر کریں گے، جس سے ملک کی معاشی سمت مزید واضح ہوگی۔
محمد اورنگزیب نے کہا کہ آئی ایم ایف کی ٹیم کا حالیہ دورہ پاکستان خوش آئند رہا اور میکرو اکنامک استحکام کو مزید مضبوط بنانے کے لیے حکومتی اصلاحاتی ایجنڈے پر بات چیت ہوئی۔ ان کا کہنا تھا کہ معیشت کی بہتری کے لیے تمام اہداف حاصل کرنے کا عزم کیا گیا ہے، اور ہر شعبے میں اصلاحات کا عمل تیزی سے جاری ہے۔
وزیر خزانہ نے کہا کہ ٹیکس نیٹ کو وسعت دی جا رہی ہے اور معیشت کی مضبوطی کے لیے تمام سیکٹرز کو اپنا کردار ادا کرنا ہوگا۔ انہوں نے چاروں وزرائے اعلیٰ کی جانب سے معیشت کی بہتری میں تعاون کی یقین دہانی کو سراہا۔
انہوں نے موسمیاتی تبدیلی کے چیلنجز کو اجاگر کرتے ہوئے کہا کہ پاکستان کو “چارٹرڈ آف اکانومی” کے ساتھ ساتھ “چارٹرڈ آف انوائرنمنٹ” کی بھی ضرورت ہے۔ اسکولوں سے باہر بچوں بالخصوص بچیوں کی تعداد پر تشویش کا اظہار کرتے ہوئے انہوں نے ان کی بہتر نشونما اور تعلیم کو ملک کے مستقبل کے لیے ضروری قرار دیا۔
وزیر خزانہ نے مزید کہا کہ امریکا میں عالمی ریٹنگ ایجنسیز موڈیز اور فچ کے ساتھ ہونے والی مثبت بات چیت پاکستان کے لیے حوصلہ افزا ثابت ہو رہی ہے، اور حکومتی اقدامات کا مثبت اثر عالمی سطح پر محسوس کیا جا رہا ہے۔
