کراچی میں خاتون کو موٹر سائیکل پر بٹھا کر وارداتیں کرنے والا تین رکنی گروہ گرفتار، ملزمان کا کرمنل ریکارڈ بھی سامنے آ گیا۔ سرجانی پولیس نے وارداتوں میں ملوث گروہ کو گرفتار کرنے میں کامیابی حاصل کی۔
ایس ایس پی ویسٹ طارق الہٰی نے بتایا کہ ملزمان نے ناظم آباد میں راہگیر کو لوٹا، اور پولیس کے ساتھ مقابلے میں زخمی حالت میں پکڑے گئے۔ سی سی ٹی وی فوٹیج میں بھی ملزمان کو واردات کرتے ہوئے دیکھا جا سکتا ہے۔
طارق الہٰی نے مزید کہا کہ خاتون کے موٹر سائیکل پر ساتھ ہونے کی وجہ سے ملزمان پولیس کی چیکنگ سے بچ جاتے تھے۔ گرفتار ملزمان میں اویس عرف کالا، احمد علی اور ایک ملزمہ شامل ہیں، جن سے تفتیش جاری ہے۔
یہاں یہ بھی یاد رہے کہ کراچی میں رینجرز اور پولیس نے لیاری سے دو انتہائی مطلوب ملزمان کو گرفتار کیا تھا، جن میں سے ایک ملزم اپنی بیوی کے ساتھ وارداتیں کرتا تھا۔ رینجرز کے ترجمان نے بتایا کہ یہ ملزمان چوری اور چھینی گئی موٹر سائیکلوں کے نمبرز تبدیل کرتے اور پھر ٹیمپرڈ موٹر سائیکلیں بلوچستان میں فروخت کرتے تھے۔
