تفصیلات کے مطابق ترجمان دفتر خارجہ کی جانب سے بیان میں کہا گیا ہے کہ روسی نائب وزیراعظم الیکسی اوور چوک 2 روزہ دورے پر پاکستان پہنچ گئے، پاکستان کےسفیرخالدجمالی اورایڈیشنل سیکرٹری خارجہ نے معزز مہمان کا استقبال کیا۔دورے کے دوران الیکسی اوورچوک صدرآصف زرداری، وزیراعظم شہباز شریف اور نائب وزیراعظم سے ملاقاتیں کریں گے۔نائب وزیراعظم اسحاق ڈار اور روسی ہم منصب کے درمیان باضابطہ مذاکرات ہوں گے، جن میں پاکستان اور روس کے درمیان تجارت و معاشی تعاون پر بات چیت ہوگی۔ دونوں ممالک کے درمیان ریل اور روڈ روابط کے فروغ کے لیے یہ اہم دورہ ہے۔ترجمان کا کہنا تھا کہ پاکستان اورروس کےدرمیان دوستی اوراعتمادپرمبنی خوشگوارتعلقات ہیں۔خیال رہے یہ کئی سالوں کے بعد روسی فیڈریشن کے کسی عہدیدار کا اعلیٰ سطح کا دورہ ہوگا اور 3 جولائی 2024 کو آستانہ (قازقستان) میں شنگھائی تعاون تنظیم کے سربراہ اجلاس کے موقع پر وزیر اعظم شہباز شریف اور روسی صدر ولادیمیر پیوٹن کے درمیان ہونے والی بات چیت کے بعد ہوگا۔یاد رہے گزشتہ سال پاکستان نےرعایت پر روسی خام تیل کی خریداری شروع کی تھی، جس کے بعد پاکستان کو گزشتہ ستمبر میں روس سے مائع پیٹرولیم گیس کی پہلی کھیپ بھی موصول ہوئی، جو کہ اسلام آباد کی دوسری بڑی روسی توانائی کی خریداری ہے۔
12
