نئی دہلی : بھارت نے میانمار سے مطالبہ کیا ہے کہ بھارتی کرنسی کے ذریعے تجارت میں تیزی لائی جائے جس کے طریقہ کاری کی منظوری پہلے ہی دی جاچکی ہے۔ہندوستان کے دورے پر آئے میانمار کے وزیر تجارت یو آنگ ناجن او سے ہندوستانی برآمد کنندگان کے ایک وفد نے کولکتہ میں ملاقات کے دوران اس مسئلے کو پیش کیا۔ برآمدی باڈی کے ارکان کے مطابق باہمی کرنسی کے ذریعے ہونے والی تجارت میں تیزی لائے جائے گی جس کے طریقہ کاری کی پہلے ہی منظوری دی جاچکی ہے۔ پی کے انجینئرنگ ایکسپورٹ پروموشن کونسل کے سابق چیئرمین پی کے شاہ نے میڈیا کو بتایا میانمار کے وزیر نے یقین دلایا ہے کہ جلد نئے طریقہ کار پر عملدرآمد کو یقینی بنایا جائے گا۔میانمار کو زرمبادلہ کے ذخائر کی کمی کا سامنا ہے، اس نے گزشتہ سال اعلان کیا تھا کہ وہ تھائی بھات اور چین کی رینمنبی (کرنسی) کے ساتھ ساتھ جلد ہی بھارتی روپے کو بھی سرکاری سیٹلمنٹ کرنسی کے طور پر قبول کرنا شروع کر دے گا، جس کا مقصد امریکی ڈالر پر انحصار کو کم کرنا ہے۔برآمد کنندگان کا کہنا ہے کہ مذکورہ معاہدے کے تحت انڈیا سے دواسازی اور مینوفیکچرنگ اشیا کے ساتھ ساتھ میانمار سے دالیں، لکڑی اور دیگر مصنوعات کی زیادہ درآمدات میں مدد ملے گی۔ مقامی کرنسیوں کے ذریعے نئے تجارتی طریقہ کار کے فعال ہونے کے بعد دونوں ممالک کے درمیان تجارت 1.8 بلین ڈالر کی موجودہ سطح سے نمایاں طور پر بڑھ جائے گی۔
91
