شاہ محمود قریشی کا کہنا ہے کہ حکومت نے بجٹ سے عوام کی مشکلات میں اضافہ کر دیا ہے۔ تفصیلات کے مطابق وائس چیئرمین تحریک انصاف شاہ محمود قریشی نے میڈیا سے گفتگو میں حکومت پر طنز کرتے ہوئے کہا ہے کہ حکومت نے تو آئی ایم ایف پروگرام لانا تھا؟ حکومت کے 42 دن باقی رہ گئے ہیں،جو بھی حکومت آئے گی بجٹ پر نظر ثانی کرنا ہو گی۔انہوں نے سوال اٹھاتے ہوئے کہا کہ بجٹ میں ساڑھے 6 ارب روپے کا سرپلس دکھایا گیا وہ کہاں سے آئے گا؟ تنخواہوں میں 30 سے 35 فیصد اضافہ ہو گا پیسہ کہاں ہے آپ کے پاس؟ کیا ترقیاتی بجٹ کا پیسہ پنجاب سے دیا جائے گا؟۔ شاہ محمود قریشی کا کہنا تھا کہ عوام کو اس بجٹ میں کوئی ریلیف نہیں دیا گیا،الیکشن تو ہونا ہے اب گر آئین سے ماورا کوئی کام ہو تو میں کیا کہہ سکتا ہوں۔بجٹ میں الیکشن کیلئے پیسہ رکھا ہے نیتوں کا حال اللہ جانتا ہے۔ انہوں نے مزید کہا کہ اسحاق ڈار پاکستان کی معیشت کے ہٹ مین ہیں،غریب اور متوسط طبقے کو بجٹ میں کوئی رعایت نہیں دی گئی۔ دوسری جانب وائس چیئرمین پی ٹی آئی شاہ محمود قریشی کی سابق وزیراعظم عمران خان سے ایک اور ملاقات کی اطلاعات ہیں،ملاقات میں سیاسی صورتحال اور جیلوں میں قید کارکنوں کی رہائی کے لیے اقدامات پر تبادلہ خیال کیا گیا۔جبکہ اس سے پہلے جیل سے رہا ہونے کے بعد اگلے ہی روز بھی وائس چیئرمین پی ٹی آئی شاہ محمود قریشی نے سابق وزیراعظم عمران خان سے ملاقات کی تھی جس کے حوالے سے خبریں آئی تھیں کہ وہ ملاقات تلخی پر اختتام پذیر ہوئی، تاہم عمران خان نے شاہ محمود قریشی کے ساتھ تلخی کی بھی تردید کی، میڈیا نمائندگان سے غیر رسمی گفتگو کے دوران صحافی نے سوال کیا کہ شاہ محمود قریشی سے کیسی میٹنگ رہی؟ اس کے جواب میں عمران خان نے کہا کہ کیسی میٹنگ ہونی تھی،بیچارے کو ایک مہینہ جیل میں رکھا گیا۔
45
