اینٹی کرپشن مقدمہ،علی محمد خان کو رہائی کے بعد اینٹی کرپشن پولیس نے گرفتار کر لیا۔ تفصیلات کے مطابق انسداد دہشت گردی عدالت مردان سے رہائی کے بعد تحریک انصاف کے رہنما علی محمد خان کو ایک بار پھر گرفتار کر لیا گیا ہے۔ علی محمد خان کو اینٹی کرپشن پولیس نے گرفتار کیا۔ پولیس کے مطابق علی محمد خان کا نام اینٹی کرپشن کے مقدمے میں بھی شامل ہیں۔یاد رہے کہ گزشتہ روز پولیس علی محمد خان کو پشاور ہائی کورٹ کے احاطے سے گرفتار کر کے مردان لے گئی تھی۔ تھری ایم پی کے تحت گرفتار تحریک انصاف کے رہنما علی محمد خان کو پشاور ہائی کورٹ نے رہا کرنے کا حکم دیا تھا۔ ڈپٹی کمشنرپشاور کے پاس ایک لاکھ کے مچلکے جمع کرانے کے بعد جب سینٹرل جیل پشاور سےعلی محمد خان کو رہا کیا گیا تو مردان پولیس نے انھیں جیل کے احاطے سے دوبارہ تحویل میں لے لیا تھا۔علی محمد خان پرمردان میں 9 مئی کے واقعات میں ملوث ہونے کے مقدمات درج ہے۔ جبکہ وزارتِ داخلہ نے امریکی قونصل جنرل لاہور کو پاکستانی نژاد امریکی شہری خدیجہ شاہ تک رسائی کی اجازت دے دی،خدیجہ شاہ 9 مئی کے واقعات میں ملوث ہونے کے الزام پر لاہور کی جیل میں قید ہیں۔ وزارتِ داخلہ نے قونصلر رسائی کی اجازت کیلئے محکمہ داخلہ پنجاب کو خط لکھا۔امریکی قونصلیٹ لاہور کے حکام کو وفاقی وزارت داخلہ کی طرف سے جاری احکامات کے بعد خدیجہ شاہ تک قونصلر رسائی دی گئی۔ جبکہ امریکی محکمہ خارجہ کے ترجمان نے ہفتہ وار پریس بریفنگ کے دوران کہا تھا کہ خدیجہ شاہ کے کیس کو فالوکررہے ہیں۔ یہاں یہ بھی واضح رہے کہ خدیجہ شاہ سابق آرمی چیف جنرل ریٹائرڈ آصف نواز جنجوعہ کی نواسی اور سابق وزیرخزانہ سلمان شاہ کی صاحبزادی ہیں۔
42
