اسلام آباد : وزیراعظم محمد شہباز شریف نے سوڈان سے پاکستانیوں کے انخلا میں مدد کرنے پر سعودی عرب، ترکیہ اور مصر کی قیادت کا شکریہ ادا کیا ہے۔ وزیراعظم آفس کے میڈیا ونگ سے جاری بیان کے مطابق وزیراعظم نے وزیر خارجہ بلاول بھٹو زرداری، وزیر مملکت حناربانی کھر، وزارت خارجہ کے حکام اور سوڈان میں پاکستانی سفیر کو شاباش دی، وزیراعظم نے عسکری حکام اور تمام متعلقہ ذمہ داران کی فرض شناسی، شاندار مہارت سے انخلا کی جامع حکمت عملی کی تیاری اور کامیابی سے اس پر عملدرآمد کی تعریف کرتے ہوئے فضائیہ کے سربراہ ائیر چیف مارشل ظہیر احمد بابر سدھو اور ڈی جی آئی ایس آئی لیفٹیننٹ جنرل ندیم انجم کو خصوصی کاوشوں پر خراج تحسین پیش کیا۔
بتایا گیا ہے کہ پاکستانیوں کی وطن واپسی کے لئے دوست ممالک اور خطے میں پاکستانی سفارتخانے مدد کر رہے ہیں، جنگ زدہ سوڈان سے پاکستانیوں کی بحفاظت وطن واپسی کا پلان کامیاب ہوگیا، 72 گھنٹے سے جاری خصوصی ہنگامی پلان کی نگرانی براہ راست وزیراعظم شہباز شریف خود کر رہے تھے، 427 پاکستانی بحفاظت پورٹ سوڈان پہنچ گئے جہاں سے وہ پاکستان پہنچیں گے، ان 427 پاکستانیوں کی رہائش ، خوراک کا انتظام بھی حکومت پاکستان نے کیا۔
بیان میں مزید کہا گیا کہ سوڈان میں جنگ کی وجہ سے پاکستانیوں کو مشکلات اور خطرات کا سامنا تھا، حکومت پاکستان نے پاکستانیوں کے انخلا کے لئے محفوظ راستوں کا تعین کیا، پاکستانیوں کو چھوٹے چھوٹے گروہوں کی شکل میں خرطوم سے محفوظ مقامات پر پہنچایا جا رہا ہے، برادر ممالک سعودی عرب، ترکیہ اور مصر نے پاکستانیوں کے انخلا میں خصوصی معاونت کی ہے جس پر وزیراعظم شہباز شریف نے سعودی عرب، ترکیہ اور مصر کی قیادت کا شکریہ ادا کیا ہے۔
سرکاری خبر رساں ادارے اے پی پی نے رپورٹ کیا ہے کہ وزیر خارجہ بلاول بھٹو زرداری نے سعودی وزیر خارجہ فیصل بن فرحان کے ساتھ ٹیلی فونک رابطہ کیا، اس دوران وزیر خارجہ نے مسلم امہ میں اتحاد اور خطے میں استحکام کے حوالے سے سعودی عرب کی کامیاب خارجہ پالیسی کو سراہتے ہوئے کہا کہ سوڈان سے پاکستانیوں کے انخلاء میں مدد کے لیے سعودی عرب کی حکومت کا کردار قابل ستائش ہے۔ معلوم ہوا ہے کہ وزیرخارجہ بلاول بھٹو زرداری نے سعودی ہم منصب فیصل بن فرحان کو عید کی مبارکباد دی، سعودی وزیر خارجہ سے گفتگو کرتے ہوئے بلاول بھٹو زرداری نے خادم الحرمین شریفین سلمان بن عبدالعزیز، ولی عہد محمد بن سلمان اور سعودی عرب کے عوام کے لیے بھی مبارک باد کا پیغام پہنچایا۔
