تفصیلات کے مطابق ایف آئی اے نے جعلی پلاٹس الاٹمنٹ اسکینڈل میں ملوث سی ڈی اے کے 5 افسران کو گرفتار کر لیا ہے، گرفتار ہونے والے ملزمان میں اصغر علی، راجہ شعیب ملال، تیمور احمد، عنایت اللہ اور آفتاب احمد شامل ہیں۔ کرپشن اور بدعنوانی میں ملوث گرفتار ملزمان سی ڈی اے میں اسسٹنٹ ڈائریکٹر اور ڈپٹی ڈائریکٹر کے عہدوں پر فائز تھے، ملزمان کی گرفتاری اسپیشل جج سینٹرل II اسلام آباد سے ضمانت قبل از گرفتاری منسوخ ہونے پر عمل میں لائی گئی۔ ابتدائی تفتیش کے مطابق ملزمان نے جعلی اراضی کے متاثرین ظاہر کر کے اسلام آباد کے سیکٹرز I-14، E-11 اور D-13 میں غیر قانونی طور پر 43 پلاٹس الاٹ کیے، اس غیر قانونی الاٹمنٹس سے قومی خزانے کو تقریباً ایک ارب روپے کا نقصان پہنچا۔ ترجمان ایف آئی اے کے مطابق ملزمان جعلی فائلوں کی بنیاد پر پلاٹس الاٹ کر کے اختیارات کا ناجائز استعمال کرنے میں ملوث پائے گئے، ملزمان کو گرفتار کر کے تفتیش کا آغاز کر دیا گیا، جب کہ ملزمان کے ساتھ شریک دیگر ساتھیوں کے خلاف چھاپا مار کاروائیاں جاری ہیں۔
13
